SON DƏQİQƏ

Bakı Dövlət Universitetinin nəzdində İqtisadiyyat və Humanitar Kollecdə Azərbaycan xalqının Ümummilli Lideri Heydər Əliyevin vəfatının 18-cü ildönümü ilə əlaqədar anım mərasimi keçirilib. Tədbir himn və bir dəqiqəlik anım ilə başlayıb. Kollecin direktoru, professor Səhər Orucova mərasimdə çıxış edərək Ulu Öndər Heydər Əliyevin həyat və fəaliyyəti haqqında məlumat verib. Bildirib ki, Heydər Əliyev bütün ömrünü istər sovet imperiyası dönəmində, istərsə də Azərbaycan Respublikasının müstəqilliyinin bərpasından sonrakı dövrlərdə Azərbaycan xalqına, Azərbaycan dövlətinin möhkəmlənməsinə həsr edib. Direktor Azərbaycanın müstəqilliyinin bərpasının ilk illərində Ermənistanın Azərbaycana qarşı təcavüzünün davam etməsi, eləcə də daxili çəkişmələrin baş verdiyi bir zamanda Ulu Öndərin Azərbaycanın müstəqilliyinin qorunub saxlanılmasında misilsiz xidmətlərinin olduğunu bildirib, onun apardığı siyasət nəticəsində Dağlıq Qarabağ münaqişəsində atəşkəsin əldə olunduğunu, Ermənistanın təcavüzkar siyasətinin, Azərbaycanın Dağlıq Qarabağ münaqişəsi ilə bağlı sərgilədiyi ədalətli mövqeyinin dünya ictimaiyyətinin diqqətinə çatdırıldığını, eləcə də onun layiqli davamçısı Prezident İlham Əliyevin 30 illik işğala son qoyaraq ata vəsiyyətini yerinə yetirdiyini qeyd edib. Tədbirin bədii hissəsi Kollecin yaradıcılıq mərkəzinin üzvlərinin hazırladıqları slaydlar və maraqlı çıxışlarla davam edib. Tədbirdə tələbələr Ulu Öndərin kəlamlarını, haqqında olan şeirlər səsləndirib.