SON DƏQİQƏ

28 dekabr Bakı Dövlət Universitetinin nəzdində İqtisadiyyat və Humanitar Kollecdə Dünya Azərbaycanlıların Həmrəyliyi Günü və Yeni il münasibətilə tədbir keçirilib. Tədbir Azərbaycan Respublikasının dövlət himni ilə başlayıb. Tədbiri giriş sözü ilə açan Kollecin direktoru Səhər Orucova 31 dekabrın Həmrəylik Günü kimi təqvimə salınmasının Ulu Öndər Heydər Əliyevin adı ilə bağlı olduğunu qeyd edib: "Torpaqlarımızın işğaldan azad olunması həm də milli həmrəylimizin təntənəsi, xalqımızın öz rəhbəri ətrafında sıx birləşməsinin təcəssümü oldu. 2020-ci il sentyabrın 27-də Ermənistanın ölkəmizə qarşı törətdiyi hərbi təcavüzə cavab olaraq Azərbaycan xalqı Ümummilli Liderimiz Heydər Əliyevin siyasi kursunun layiqli davamçısı, Ali Baş Komandan, Prezident İlham Əliyevin çağırışı ilə Vətən müharibəsinə qalxdı. Vətən müharibəsində dünyanın bütün ölkələrində yaşayan azərbaycanlılar yüksək dərəcədə fəallıq göstərdilər, düşmənin məkrli təxribatlarına qarşı etirazları, Azərbaycan həqiqətlərinin dünya ictimaiyyətinə çatdırılması işində fədakar xidmətləri Zəfərimizə layiqli töhfə oldu. Bu savaşda xalqımız İlham Əliyevin rəhbərliyi ilə milli həmrəyliyin ən mükəmməl nümunəsini yaratdı". Direktor Kollecin əməkdaşlarını, müəllimlərini və tələbələri bayram münasibətilə təbrik edərək onlara yeni ildə yeni nailiyyətlər, uğurlar arzu edib. Tədbirdə Kollecin rəqs qrupunun, tələbələrin ifasında rəqslər, şeirlər, səhnəciklər nümayiş etdirilib, müğənnilər Türkan Abbasova, Vüqar Əlioğlu və Dj Eljan tərəfindən mahnılar səsləndirilib.