Bakı Dövlət Universitetinin nəzdində İqtisadiyyat və Humanitar Kollecdə 21 May- Dialoq və İnkişaf Uğrunda Dünya Mədəni Müxtəliflik Günü münasibəti ilə kollecin Xarici dil Fənn Birləşməsi müəllimlərinin təşəbbüsü ilə “Beynəlxalq Mədəniyyət Günü və Dil Sərgisi” təşkil olunub. Tədbirdə Abşeron Rayon İcra Hakimiyyətinin icra başçısının müavini Gülnar Rəhimova da iştirak edib.
Tədbirdə müxtəlif ölkələrin mədəniyyətini, adət-ənənələrini, milli geyimlərini, mətbəx nümunələrini və dillərini əks etdirən guşələr nümayiş etdirilib. Tələbələr hazırladıqları təqdimatlar vasitəsilə müxtəlif xalqların tarixi, mədəniyyəti və dil xüsusiyyətləri haqqında ətraflı məlumat veriblər.
Sərgi çərçivəsində xarici dillərdə mahnı və rəqslər ifa olunub, interaktiv təqdimatlar keçirilib. İştirakçılar fərqli mədəniyyətlər arasında dostluq, qarşılıqlı hörmət və əməkdaşlıq dəyərlərinin əhəmiyyətini vurğulayıblar.