27 Sentyabr – Anım Günü ilə əlaqədar BDU-nun nəzdində İqtisadiyyat və Humanitar Kollecində “ Unutmadıq, unutdurmarıq!” adlı tədbir keçirilib.
Tədbirdə əvvəlcə Azərbaycanın Dövlət Himni səsləndirilib, Ümummilli lider Heydər Əliyevin və Vətənimizin ərazi bütövlüyü və suverenliyi uğrunda canından keçmiş şəhidlərin əziz xatirəsi bir dəqiqəlik sükutla yad edilib. Kollecin direktoru Hicran Əyyubova
çıxışında 44 günlük Vətən müharibəsində Azərbaycan Ordusunun göstərdiyi qəhrəmanlıqdan, şəhidlərimizin Vətən qarşısındakı misilsiz xidmətlərindən bəhs edərək onların əziz xatirəsinin daim qəlbimizdə yaşayacağını, qəhrəmanlıqlarının gələcək nəsillər üçün Vətənə sevgi və sədaqət nümunəsi olduğunu bildirib. Kollecin şəhid məzunu Nicat Səmədovun atası Şahin Səmədov çıxışında oğlu ilə bağlı xatirələrini bölüşüb, gənclərə müraciət edərək Vətəni sevməyi, onun dəyərlərini qorumağı, dövlətə və xalqa layiqli vətəndaş olmağı, şəhidlərin müqəddəs irsinə sadiq qalmağı tövsiyə edib.
Tədbir tələbələrin hazırladığı ədəbi-bədii kompozisiya ilə yekunlaşıb.
