zərbaycan Respublikası Prezidentinin 2024-cü il 19 sentyabr tarixli sərəncamı ilə təsdiq edilmiş “20 sentyabr Dövlət Suverenliyi Günü” ilə əlaqədar Bakı Dövlət Universitetinin nəzdində İqtisadiyyat və Humanitar Kollecdə dəyirmi masa təşkil edilib.
Tədbir Azərbaycanın Dövlət Himninin səslənməsi ilə başlanıb. Ümummilli lider Heydər Əliyevin və Azərbaycanın bütövlüyü uğrunda canlarını qurban vermiş şəhidlərimizin xatirəsi 1 dəqiqəlik sükutla yad edilib. Sonra Dövlət Suverenliyi gününə həsr edilmiş videoçarx nümayiş etdirilib. Tədbirdə çıxış edən Kollecin tarix fənn müəllimi İradə Mayılova 2023-cü il 19-20 sentyabrda keçirilmiş lokal xarakterli antiterror tədbirləri nəticəsində Azərbaycanın ərazi bütövlüyünün və dövlət suverenliyinin tam bərpa olunduğunu və tariximizin şanlı səhifəsi olduğunu bildirib. Həmçinin vurğulanıb ki, Azərbaycan xalqı üçün suverenlik sadəcə siyasi status deyil, həm də milli qürur, kimlik və gələcək nəsillərə miras qoyulmuş müqəddəs dəyərdir. Qürurverici haldır ki, bu gün Azərbaycanın Dövlət Bayrağı suverenliyimizin bərqərar olduğu bütün torpaqlarda əzəmətlə dalğalanır.