Bakı Dövlət Universitetinin nəzdində fəaliyyət göstərən İqtisadiyyat və Humanitar Kollecində millət vəkili Nigar Məmmədova və psixoloq Narınc Rüstəmovanın iştirakı ilə “İmtahan həyəcanı” mövzusunda maarifləndirici və praktik təlim təşkil edilib.Təlimin əsas məqsədi tələbələrin imtahan dövründə yaşadıqları psixoloji gərginliyin səbəblərini izah etmək, imtahan həyəcanının idarə olunması yollarını öyrətmək və onların emosional dayanıqlığını gücləndirmək oldu. Təlim çərçivəsində imtahan stresinin psixoloji mexanizmləri, həyəcanın performansa təsiri, vaxtın düzgün planlaşdırılması, diqqətin cəmlənməsi, özünə inamın artırılması, eləcə də nəfəs və rahatlama texnikaları barədə ətraflı məlumat verildi. Eyni zamanda interaktiv müzakirələr, praktiki tapşırıqlar və real situasiyalar üzərindən aparılan izahlar vasitəsilə tələbələrin sualları cavablandırılıb, onların şəxsi təcrübələri dinlənilib. Maarifləndirici məzmunu və səmərəli praktik yanaşması ilə seçilən təlim tələbələr tərəfindən böyük maraq və müsbət rəy ilə qarşılanıb.